yesterday i gave my first session in WordCamp Egypt  .. It was my first session ever

need ur feedback if u were there ..

thnx

لا تقلق !!! ..

كنت قاعد بعد الكلمة دي سمعتها كام مرة في الكلية دي .. طلعوا كتيييير !!!

أولا : في الشئون علشان كنت بسأل على الملف بتاعي اللي لسة ماوصلش الكلية و ممكن مادخلش الامتحان بسببه

ثانيا : برده في الشئون في الاشتراك اللي بيتختم في الادارة بتاعت الكلية بقالو 3 أيام (أصلهم بيبقوا تعبوا من الشغل و جالهم شد في عضلة الصوبع المساعد للصوبعين اللي بيشيلوا الختامة )

ثالثا : كمان مرة في الشئون لما بتقدم للمدينة و بيبقوا عايزين يبعتوك شوية مشاوير علشان تحس بقيمة العلم

رابعا : من الدكتور في أول محاضرة لما بيبقى عايز يطمنك انو مش بيشيل حد المادة و تلاقي نص الدفعة شايلة المادة أخر السنة

خامسا : لما يقولك ان المبنى بتاع الكلية حيخلص بكرة و ان شاء الله مافيش أي حاجة حاتخدها برة المبنى

سادسا : لما تلاقي معيد خفيف ظريف بيقولها تريقة على المنهج علشان يخوفنا منه علشان مش عاجبه المنهج و عايز يغيره ( أصله اشترى الكلية أول امبارح )

سابعا : أنا لما قولتها أكتر من مرة و أنا بستعيد ذكريات لا تقلق معايا

دايما كان نفسي أروح مكتبة الأسكندرية بس الكسل كالعادة بيقتل كل حاجة .. المهم أخيرا قررت أنا و إسلام محمود اننا نروح المكتبة

و أول ما رجع إسلام كتب عن اليوم ده الصراحة كان يوم جميل جدا  جدا

مش حتكلم عن اليوم ده كتير .. أنا بس كنت عايز أوصف المكتبة للي ماشفهاش ..

المكتبة من جوه متقسمة حوالي 6 أو 7 أدوار مش فاكر .. أول ما بتدخل بتلاقي شوية ماكينات و أجهزه كانت مستخدمة في الطباعة زمان وبعد كدة حتلاقي أرفف للكتب و أماكن علشان تقرا فيها

كل دور بيبقى متقسم بشوية مجالات غالبا مرتبطة ببعض و بيبقى فيه ناس موجودة لو عايز تسأل على أي حاجة و في كل دور بيبقى فيه واحد قاعد على جهاز عليه الداتابيز بتاعت الكتب تسأله على أي كتاب يبحث عنه و يجيبلك مكانه في المكتبة

بالنسبة للتعامل مع الكتب : تاخد الكتاب و تقراه و ماترجعوش مكانه بيبقى فيه أماكن بيتحط فيها الكتاب و هما يرجعوه مكانه

فيه أماكن مغلقة في كل دور مخصصة لطلبة الدراسات العليا للبحث بعيدا عن ضوضاء المكتبة (على فكرة المكتبة أصلا مافيهاش صوت و أي حركه تلاقي كلو مستغرب الصوت جاي منين )

في أجهزة كمبيوتر للحجز و في نت ويرليس أكيد للي معاه لابتوب و أماكن مخصصة لتوصيل الكهرباء و كابلات اللان كمان

قوانين المكتبة اللي لاحظتها :

1- أي حاجة معاك تتسلم الأمانات و مستحيل تدخل بيها

2- لو معاك لابتوب ممكن تدخل بيه بس تثبته في غرفة الموظفين

3- ممنوع دخول أقل من 16 سنة القسم العام و لو معاك أطفال تسيبهم فوق و تنزل القسم الرئيسي من غيرهم

أي سؤال ابعت comment