إني صائم

مش عارف ليه الناس في رمضان بتطلع أفكار عجيبة مش عارف بتجيبها منين و نفسي أعرفلها سبب

أولا : و أنت ماشي في الشارع تلاقي كل الناس بتزعق و يطلع واحد يقولك “أنا صايم و مش ناقص كلمة” يرد عليه التاني “ياعم يعني احنا اللي كفرة؟؟؟

اللي أعرفه ان من أهداف الصيام انك تحفظ لسانك و أنك تقوي الجانب الروحاني عن الجانب الحيواني اللي هو الأكل و الشرب و الشهوة مش انك تبقى مقتنع انك تعبان علشان مكلتش رغم انك في غير رمضان ساعات بتاكل بعد العشاء

عن أبي هريرة – رضي الله عنه – أن رسول الله – صلى الله عليه وسلم – قال :

“الصيام جنة فلا يرفث ولا يجهل وإن امرؤ قاتله أو شاتمه فليقل إني صائم مرتين والذي نفسي بيده لخلوف فم الصائم أطيب عند الله تعالى من ريح المسك يترك طعامه وشرابه وشهوته من أجلي الصيام لي وأنا أجزي به والحسنة بعشر أمثالها “

ثانيا : تلاقي معظم الناس بيسئلوا عن المسلسلات و معظم المسلسلات تتأجل للعرض علشان تبقى في شهر رمضان علشان تلاقي نجاح أكبر

الظاهر الناس فهموا كلمة “رمضان كريم” غلط المفروض ان رمضان كريم ان الجزاء بيبقى مضاعف و بان النفوس بتبقى مرتاحة مش ان بيبقى فيه مسلسلات كتير

ثالثا : تلاقي في بنات تتحجب في رمضان و بعد رمضان ولا أكنها كانت لابسة حجاب في رمضان

هو الحجاب فرض في رمضان و مكروه بقيت السنة ولا ايه ؟؟؟

رابعا : الخيمات الرمضانية ليه ماتتأجلش لبعد رمضان ولا  هوه لازم الناس تلاقي حاجة تهرب بيها من العبادة ؟؟ (لو جابوا فيها حد يفكر الناس بالذكر و الصلاه أظن الموضوع حيبقى مختلف)

خامسا : الناس اللي بتبكي في الصلاه بصوت عالي

البكاء مش من أركان الصلاة و ماظنش ان انتا ماتقدرش توطي صوتك في البكاء و أنا مش قصدي انك ماتبكيش بالعكس

عن أبي هريرة رضي الله عنه عن النبي صلى الله عليه وسلم قال : ” سبعة يظلهم الله في ظله يوم لا ظل إلا ظله”

و ذكر منهم “رجل ذكر الله خالياً ففاضت عيناه“

بس ماقلش ان كل ما عليت كل ما كان أحسن

سادسا : تلاقي كلمة مشهورة (حرام احنا في رمضان ) يعني انت مستني رمضان يعدي علشان تعصي ربنا ولا هو حرام في رمضان حلال بقيت السنة ؟؟

طبعا الخير موجود كتير و الناس ما شاء الله كل سنة أحسن من اللي قبلها بس أنا حبيت أفكر الناس بكذا حاجة كدة من السلبيات اللي بتحصل و دي الحاجات اللي أنا افتكرتها دلوقتي يا ريت اللي عندو اضافة يبعت تعليق