انت فاشل؟؟؟

طبعا بما اني خبير في علم النفس (ماعرفش فيه الا انو علم يدرس النفس البشرية)

قررت اني اعمل اختبار صغير لقياس نسبة الفشل

س1 أول ما بتبدأ السنة ….

 

 

1 – بذاكر من أول يوم طبعا .. أنا عايز أجيب امتياز

2 – ربنا يسهل … احنا لسة بنقول يا هادي

3 – يا عم انتا بتتكلم في ايه … ده كويس اني باحضر

4 – يا راجل؟؟؟ هي الدراسة بدأت؟؟؟

5 – هو احنا في كلية ايه؟؟

____________________________________________________________________

س2 بعد شهر من الدراسة …

____________________

1 – الحمد لله .. ماشي مع المحاضرات و السكاشن وحدة وحدة ..

2 – كدة بقى أنا لازم أذاكر اللي أنا باخده في المحاضرات

3 – أنا بستهبل لازم أحضر بقى

4 – السلام عليكم .. لو سمحت .. هو مبنى الكلية فين؟؟؟

5 – هو احنا في سنة كام؟؟

_____________________________________________________________

س3 امتحان الميدتيرم فاضل عليه اسبوعين …

__________________________________

1 – أخيرا .. حشوف مستوايا ..

2 – عايز ألحق أراجع بقى

3- عايز أجيب ورق بقى ولا أي حاجة علشان أذاكر …

4 – احنا فين و الامتحان فين …

5 – أنا عايز أشوف الكلية

_____________________________________________________________

س4 قبل الميدتيرم بيوم …

—————

1 – طوارئ … محدش يدخل.. بذاكر ..

2 – يا رب ألحق أراجع

3 – يللا نلم اللي ناقص بقى قبل الامتحان ..

4 – ايه ده الامتحان بكرة .. يللا نلحق نعمل حاجة ..

5 – بايظة بايظة .. أنا داخل أنام

——————————————————

س5 في ورقة الميدتيرم …

—————–

1 – بحل الورقة كلها صح ..

2 – بحل كله و ربنا يسهل .. مش عارف بقى صح ولا غلط

3 – بحل اللي عارفه و أسيب الباقي ..

4 – بحاول ألم درجات …

5 – أكيد الورقة بتبقى فاضية …كويس أني باحضر

——————————————————

س6 بعد امتحان الميدتيرم ….

——————–

1 – ألحق بقى أراجع قبل أخر السنة

2 – حاريح يومين كدة و أبقى أراجع

3 – لازم أعوض اللي هببته ده في أخر السنة

4 – أخيرا بقيت فاضييييييييي

5 – لما تيجي امتحانات أخر السنة ابقوا صحوني

——————————————————

س7 ليلة امتحان أخر السنة …

——————–

1 – فاضل بس حاجات بسيطة .. أنا مخلص من 3 أيام أصلا

2 – براجع اللي أنا ذاكرته و بقفل المادة

3 – بحاول أخلص الحاجات اللي ماشوفتهاش قبل كدة

4 – بحاول ألحق أي حاجة بس مش بخلص المادة

5 – أنا بفكر أأجل الامتحان ده ..

——————————————————

س8 في امتحان أخر السنة ….

——————–

1 – بقفلوا و بطلع …

2 – الحمد لله حليت كويس ..

3 – كدة أنا عوضت الميدتيرم

4 – يعني .. ان شاء الله أنجح

5 – هو احنا كان علينا ايه النهاردة؟؟

——————————————————

س9 لو لاقيت نفسك مش عارف حاجة …

—————————-

1 – عمرها ما حصلت معايا ..

2 – بترعب بس شوية و بافتكر ..

3 – بحاول و بألف شوية ..

4 – باحل اللي عارفه و أمشي ..

5 – هو ماينفعش أمشي دلوقتي؟؟

——————————————————

س10 لو اتسحبت منك الورقة ….

———————-

1 – أنا أصلا مش بغش ..

2 – بتحايل على المراقب علشان أخدها .. لازم أراجع قبل ما أمشي..

3 – أسيب الورقة و أمشي أنا أصلا خلصت ..

4 – أعمل معاه مشكلة .. مش باحب حد يعلم عليا ..

5 – أقطع الورقة و أرميها من الشباك ..و أجري من المراقب ..

——————————————————

س 11 لو الامتحان سهل ….

——————–

1 – لو كان جابه صعب كان أحسن .. أنا مذاكر كويس

2 – كدة تمام .. أنا كدة ممكن امتياز ..

3 – كويس .. أنا كنت خايف من الامتحان ده ..

4 – أخيراااااا طلعت من الامتحان و أنا عارف اني حانجح ..

5 – يا راجل .. كان سهل ؟؟ .. طيب كويس .. على العموم مش فارقة ..

——————————————————

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

النتيجة :
ــــــــــــ

لو معظم الاجابات   1        انت ايه اللي دخلك هنا يبني .. انت ماقريتش أنو اختبار للفشل ؟؟

لو معظم الاجابات  2    شوف بتاع واحد راح فين و روح وراه .. هو انتو مش بتعرفوا تقروا ؟؟

لو معظم الاجابات  3   لسة بدري عليك أوي .. بس ممكن توصل ..

لو معظم الاجابات  4  قربت قوي بس حاول شوية ..

لو معظم الاجابات  5  مبرووووووووووووووووووووك … انتا كدة ممكن تاخد شهادة أنك وصلت لمرحلة من أعلى مراحل

الفشل …